20. మేలుకొనవే నీలమేఘవర్ణుడా

ప : మేలుకొనవే నీలమేఘవర్ణుడా

వేళ తప్పకుండాను శ్రీవేంకటేశుడా

చ : మంచముపై నిద్రదేర మల్లెల వేసేరు

ముంచి తుఱుము ముడువ మొల్లల వేసేరు

కంచము పొద్దారగించ కలువల వేసేరు

పింఛపు చిక్కుదేర సంపెంగల వేసేరు

చ : కలసిన కాకదేర గన్నేరుల వేసేరు

వలపులు రేగీ విరజాజుల వేసేరు

చలువగా వాడుదేర జాజుల వేసేరు

పులకించ గురువింద పూవుల వేసేరు

చ : తమిరేగ గోపికలు తామరల వేసేరు

చెమటార మంచి తులసిని వేసేరు

అమర శ్రీవేంకటేశ అలమేలుమంగ నీకు

మమతల పన్నీటి చేమంతుల వేసేరు

Listen to Audio

మేలుకొనవే నీలమేఘవర్ణుడా